Kryeministri Zoran Zaev sot në Davos realizoi takim me komisarin evropian për zgjerim dhe fqinjësi të mirë të BE-së, Johannes Hahn.

Zaev ka informuar komisarin Hahn për takimin me kryeministrin grek, Alexis Tsipras dhe e ka njoftuar për rezultatet e atij takimi, gjë që në masë të madhe lëviz para procesin e negociatave ndërmjet dy shteteve fqinje në lidhje me çështjen e emrit, si dhe në lidhje me mundësitë për një zhvendosje të re, cilësore të marrëdhënieve dypalëshe.

Komisari Hahn ia ka përcjellur kryeministrit Zaev qëndrimin e tij në lidhje me këtë takim, duke përsëritur se është lajm shumë i mirë që tregon guxim dhe vizion dhe atë se zgjidhja e këtij kontesti do të jetë pozitive edhe për dy shtetet e përfshira në negociata por edhe për tërë rajonin.

Zaev ka theksuar se takimi me Tsiprasin është i rëndësishëm edhe për nxitjen e zbatimit të reformave të filluara në Maqedoni dhe e vërteton vullnetin politik të Qeverisë për të zgjidhur të gjitha çështjet e hapura me shtetet fqinje./Telegrafi